ކޮވިޑް 19 އަށް ގިނަ އަދަދެއްގެ ޒުވާނުން ޕޮޒިޓިވްމުންދާ ކަމަށާ އައިޖީއެމްއެޗްގެ ޑީއެޗް-11ގައި އެޑްމިޓް ކޮށްގެން ފަރުވާ ދެމުންދާ ގިނަ މީހުންނަކީ ޅަ އުމުރުގެ ޒުވާން ބަލި މީހުން ކަމަށްވިޔަސް ބަލި ކޮންޓްރޯލްކުރުމަށް މާމޮޅު އިތުރު ގޮތްތަކެއް ހެދެން ނެތްކަމަށާ ކުރެވެން އޮތްކަމަކީ ރަށްޔިތުން ފަރުދީ ޒިންމާ ނެގުންކަމަށް އައިޖީއެމްއެޗްގެ ޑޮކްޓަރު ޑރ.މުރާދު ވިދާޅުވިއެވެ.
ރަށްޔިތުން ފަރުދީ ޒިންމާ ނަގަންޖެހޭކަމަށް ވިދާޅުވެ ވާހަކަފުޅު ދައްކަވަމުން ޑރ.މުރާދު ވިދާޅުވީ މިހާރު އަޅާފައިވާ ފިޔަވަޅުތަކާއި ގައިޑްލައިނާއި އެއްގޮތައް ހުރިހާ ފަރާތްތަކުންވެސް އަމަލުކުރައްވަމުން ގެންދެވުމަށެވެ. މިގޮތުން މާސްކް އެޅުމަށާއި، އިޖްތިމާއީ ގައިދުރުކަމާއި، ކޮންމެހެން ބޭރަށް ނުކުންނަން ޖެހިގެން މެނުވީ ބޭރަށް ނުނިކުތުމަށް ޑރ.މުރާދު ވަނީ އެދިވަޑައިގެންފައެވެ.
ކޮވިޑް 19 އަށް ޕޮޒިޓިވްވެގެން އެޑްމިޓް ކޮށް ފަރުވާ ދެމުންދާ ބަލިމީހުންނާއި ބެހޭގޮތުން ވާހަކަފުޅު ދައްކަވަމުން ޑރ.މުރާދު ވިދާޅުވީ އައިޖީއެމްއެޗްގެ ޑީއެޗް-11ގައި ބަލި ހަތަރު މީހަކަށް ވެންޓިލޭޓަރުގެ އެހީގައި ފަރުވާ ދެމުންދާ ކަމަށެވެ. އަދި ޑީއެޗް-11ގައި އެޑްމިޓް ކޮށްގެން ފަރުވާ ދެމުންދާ ގިނަ މީހުންނަކީ ޅަ އުމުރުގެ ޒުވާން ބަލި މީހުން ކަމަށް ޑރ.މުރާދު ވިދާޅުވިއެވެ.
” ހާލަތު ވަރަށް ގޯސް ، ރާއްޖޭގައި ކޮވިޑަށް ޕޮޒިޓިވްވާ މީހުންގެ އަދަދު ވަރަށް ބޮޑަށް މިވަނީ އިތުރުވެފައި. ބަލީގައި ހާލު ދެރަވާ މީހުންގެ އަދަދުވެސް އިތުރު . ރާއްޖޭގައި ބަލި ފެތުރެމުންދާ ގޮތަށް ބަލާއިރު ރާއްޖޭގައި އާ ވޭރިއަންޓެއް އުޅޭ ކަމަށް ގަބޫލުކުރެވޭ ” ޑރ.މުރާދު ވިދާޅުވިއެވެ.
ކޮމެންޓްސް (0)