• Categories
  • Archives

އައްޑޫ ޓަރޝަރީ ހޮސްޕިޓަލްގެ މަސައްކަތް ނިންމާ، މިއަހަރު ޚިދުމަތްދޭން ފަށާނަން – މިނިސްޓަރ ނާޒިމް

އައްޑޫ ސިޓީގައި ސަރުކާރުން ޤާއިމުކުރާ 100 އެނދުގެ ޓަރޝަރީ ހޮސްޕިޓަލްގެ މަސައްކަތް ނިންމާ، މިއަހަރުގެ ތެރޭގައި އެތަނުން އާއްމުން ރައްޔިތުންނަށް ޚިދުމަތްދެއްވާނެކަމަށް ހެލްތް މިނިސްޓަރ ޢަބްދުﷲ ނާޒިމް އިބްރާހީމް ވިދާޅުވެއްޖެއެވެ.

ޕީ.އެސް.އެމް ނިއުސްއަށް ދެއްވި ޚާއްސަ އިންޓަރވިއުއެއްގައި މިނިސްޓަރ ނާޒިމް ވިދާޅުވީ، އައްޑޫ ޓަރޝަރީ ހޮސްޕިޓަލްގެ ކޮންސްޓްރަކްޝަންގެ ހުރިހާ މަސައްކަތެއް މިއަހަރުގެ ފުރަތަމަ ކުއަރޓަރގެ ތެރޭގައި ނިންމާލެވޭނެކަމަށެވެ. ގާތްގަނޑަކަށް 21 މިލިއަން ޑޮލަރު ޚަރަދުކޮށްގެން ކުރިއަށްގެންދާ މި މަޝްރޫޢުގެ މަސައްކަތް ސަރުކާރުން ހަވާލުކޮށްފައިވަނީ އެލިއާ ކޮންސްޓްރަކްޝަނާއެވެ.

މާލޭ ސަރަޙައްދުގެ އިތުރުން ރާއްޖޭގެ އުތުރާއި، ދެކުނުގައި ޓަރޝަރީ ފެންވަރުގެ ޚިދުމަތްދޭ ހޮސްޕިޓަލެއް ޤާއިމުކުރުމަކީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ރިޔާސީ ވަޢުދުތަކުގެތެރޭގައި ހިމެނޭ އެންމެ މުހިއްމު އެއްވަޢުދެވެ. އެގޮތުން 17ވަނަ ސާރކް ސަމިޓު ބޭއްވުމަށް އައްޑޫ ސިޓީގައި ޢިމާރާތްކުރި އިކުއެޓޯރިއަލް ކޮންވެންޝަން ސެންޓަރު، ޓަރޝަރީ ފެންވަރުގެ ހޮސްޕިޓަލަކަށް ބަދަލުކުރުމަށް ނިންމައި އެކަމުގެ ޢަމަލީ މަސައްކަތްތައް މިހާރު ވަނީ ފަށާފައެވެ. އިކުއެޓޯރިއަލް ކޮންވެންޝަން ސެންޓަރު ހުރި ޢިމާރާތަށް ގެންނަންޖެހޭ ބަދަލުތައް ގެނެއުމުގެ މަސައްކަތް ކުރުމަށް ސަރުކާރުން ޙަވާލުކޮށްފައިވަނީ އެލިއާ ކޮންސްޓްރަކްޝަނާއެވެ.

މި މަޝްރޫޢުގެ ދަށުން ކޮންވެންޝަން ސެންޓަރު ހުރި ޢިމާރާތަށް ބޮޑެތި ބަދަލުތަކެއް ގެނެސް، ޒަމާނީ ވަސީލަތްތަކާއެކު ޓަރޝަރީ ފެންވަރުގެ ޚިދުމަތްދޭ ހޮސްޕިޓަލަކަށް އެތަން ބަދަލުކުރުމަށްވަނީ ހަމަޖެހިފައެވެ. މިއާއެކު ދެކުނު ސަރަޙައްދުގެ ސިއްޙީ ނިޒާމަށް ބޮޑެތި ކުރިއެރުންތަކެއް ލިބިގެންދާނެކަމަށާއި، ރައްޔިތުންގެ ސިއްޙީ ޚިދުމަތަށް ކުރާ ހޭދަ އެތައް ގުނައެއް ކުޑަވެގެންދާނެކަމަށް ސަރުކާރުން ބުނެއެވެ.

އައްޑޫ ޓަރޝަރީ ހޮސްޕިޓަލްގެ މަސައްކަތްތައް ކުރިއަށްދާގޮތާ ގުޅޭގޮތުން ޕީ.އެސް.އެމް ނިއުސްއަށް ދެއްވި ޚާއްސަ އިންޓަރވިއެއްގައި ހެލްތް މިނިސްޓަރ ޢަބްދުﷲ ނާޒިމް އިބްރާހީމް ވިދާޅުވީ، ހޮސްޕިޓަލްގެ މަސައްކަތްތައް ތާވަލާއި އެއްގޮތަށް ވަރަށް ބާރަށް ކުރިއަށްދާކަމަށެވެ. އަދި ހޮސްޕިޓަލްގެ ކޮންސްޓްރަކްޝަންގެ ހުރިހާ މަސައްކަތެއް މިއަހަރުގެ ފުރަތަމަ ކުއަރޓަރގެ ތެރޭގައި ނިންމާލެވޭނެކަމަށެވެ. ކޮންވެންޝަން ސެންޓަރު ހުރި ޢިމާރާތަށް ގެންނަންޖެހޭ ބަދަލުތަކަށާއި، ހޮސްޕިޓަލަށް ބޭނުންވާ މެޝިނަރީޒް ހޯދުމަށް ގާތްގަނޑަކަށް 21 މިލިއަން ޑޮލަރު ޙަރަދުވާނެކަމަށް މިނިސްޓަރ ނާޒިމް ވިދާޅުވިއެވެ. އަދި އެ ހޮސްޕިޓަލަށް ބޭނުންވާ މެޝިނަރީޒް ހޯދުމުގެ މަސައްކަތް މިނިސްޓްރީން މިހާރު ކުރަމުންދާކަމަށްވެސް މިނިސްޓަރ ވިދާޅުވިއެވެ.

“މި ހޮސްޕިޓަލްގެ މަސައްކަތް ތާވަލާ އެއްގޮތަށް ވަރަށް ރަނގަޅަށް ކުރިއަށް އެބަދޭ. މި ހިނގާ 2018 ވަނަ އަހަރުގެ ފުރަތަމަ ކުއަރޓަރގެ ތެރޭގައި ހޮސްޕިޓަލް ޢިމާރާތުގެ ކޮންސްޓްރަކްޝަން ހުރިހާ މަސައްކަތެއްވެސް ނިމިގެންދާނެ. މިއީ ގާތްގަނޑަކަށް 21 މިލިއަން ޑޮލަރު ހަރަދުކޮށްގެން ބިނާކުރެވޭ ހޮސްޕިޓަލެއް. އެއީ ހޮސްޕިޓަލް އިމާރާތްކުރުމާއި އަދި ހޮސްޕިޓަލަށް ބޭނުންވާ ބައެއް މެޝިނަރީއާއި އިކުއިޕްމަންޓްސް ހޯދުމަށްޓަކާ. ހޮސްޕިޓަލަށް ބޭނުންވާ މެޝިނަރީޒް ގަތުމަށްޓަކާވެސް ބިޑްކޮށްގެން ކުރިއަށްގެންދަންޖެހޭ މުޢާމަލާތްތައް މިހާރު އެބަކުރިއަށްދޭ” ހެލްތް މިނިސްޓަރ ޢަބްދުﷲ ނާޒިމް އިބްރާހީމް ވިދާޅުވިއެވެ.

ހެލްތް މިނިސްޓަރ ނާޒިމް ވިދާޅުވީ، އައްޑޫ ސިޓީގައި ޓަރޝަރީ ހޮސްޕިޓަލެއް ޤާއިމުކުރުމުގެ މަސައްކަތަކީ ކުރީގެ ސަރުކާރުންތަކުންވެސް ކުރަން އުޅެ، ނުވެފައިވާކަމެއް ކަމަށެވެ. އެހެންނަމަވެސް އައްޑޫ ސިޓީގެ ރައްޔިތުންނަށް ޓަރޝަރީ ހޮސްޕިޓަލެއް ބިނާކުރުމުގެ ހަޤީޤީ މަންޒަރު ދައްކައިދިން ސަރުކާރަކީ ރައީސް ޔާމީންގެ ސަރުކާރުކަމަށް މިނިސްޓަރ ވިދާޅުވިއެވެ. މިނިސްޓަރ ނާޒިމް ވިދާޅުވީ، އައްޑޫ ޓަރޝަރީ ހޮސްޕިޓަލްގެ މަސައްކަތް ނިންމާ، މިއަހަރުގެ ތެރޭގައި ދެކުނު ރައްޔިތުންނަށް އެ ހޮސްޕިޓަލުން ޚިދުމަތްދޭން ފަށާނެކަމަށެވެ.

“އަޅުގަނޑު އުއްމީދުކުރަނީ ތަވާލާ އެއްގޮތަށް މިކަންކަންގޮސް، މިއަހަރުގެ ތެރޭގައި ޓަރޝަރީ ފެންވަރުގެ ހޮސްޕިޓަލެއް އައްޑޫ ސިޓީގައި ޤާއިމުވެގެންދާނެކަމަށް. އެނގިވަޑައިގަންނަވާނެ ފަދައިން މިއީ ވަރަށް ގިނަ ސަރުކާރުތަކަކުން ކުރަން އުޅެ، ނުވެފައި އޮތްކަމެއް. އެހެންނަމަވެސް މިއަދު އައްޑޫގެ ރައްޔިތުން ވަރަށް ޝުކުރުވެރިކަމާއެކު ބަލައިގަނެ، ފާހަގަކުރަނީ މި ހޮސްޕިޓަލްގެ މަސައްކަތް ވަރަށް ބާރަށް ކުރިއަށްދާކަން. އަޅުގަނޑަށް ވަރަށް ކަށަވަރުކަމާއެކު ދަންނަވަން ކެރިދާނެ މި ހޮސްޕިޓަލްގެ މަސައްކަތް ނިންމާ، އެތަނުގެ ޚިދުމަތް މިއަހަރުގެ ތެރޭގައި، އައްޑޫ ސިޓީއާއި، ދެކުނުގެ ހުރިހާ ރައްޔިތުންނަށް ލިބިގެންދާނެކަން” ހެލްތް މިނިސްޓަރ ޢަބްދުﷲ ނާޒިމް އިބްރާހީމް ވިދާޅުވިއެވެ.

މި މަޝްރޫޢަށް ގާތްގަނޑަކަށް 21 މިލިއަން ޑޮލަރު ޚަރަދުވާއިރު، އެކަމަށް ބޭނުންވާ ފައިސާ ސަޢޫދީ ފަންޑުންނާއި، އޯޕެކް ފަންޑު މެދުވެރިކޮށް ހަމަޖެހިފައިވާކަމަށް ސަރުކާރުން ބުނެއެވެ. އިކުއެޓޯރިއަލް ކޮންވެންޝަން ސެންޓަރު ޓަރޝަރީ ހޮސްޕިޓަލަކަށް ބަދަލުކުރުމުގެ މަސައްކަތް ހަލުވިކަމާއެކު ކުރިއަށްދާއިރު، ރާއްޖޭގެ އުތުރުން، ހދ.ކުޅުދުއްފުށީ ރީޖަނަލް ހޮސްޕިޓަލް 150 އެނދުގެ ޖާގައިގެ ޓަރޝަރީ ހޮސްޕިޓަލަކަށް ބަދަލުކުރުމުގެ މަސައްކަތްވެސް ސަރުކާރުން އަންނަނީ ކުރަމުންނެވެ.

  • ކޮމެންޓްސް (0)

Your email address will not be published. Required fields are marked *

  • ފުރިހަމަ ނަން

Ads

ads

ކަމުދާނެ ލިޔުންތައް

ސަރުކާރަށް ޚިދުމަތް ކުރަން ލިބުމަކީ ފަޚުރެއް – ދުންޔާ

ރައީސް އަބްދުﷲ ޔާމީންގެ ސަރުކާރަށް ޚިދުމަތް ކުރަން ލިބުމަކީ ފަޚުރެއް ކަމަށް، ހެލްތް މިނިސްޓްރީގެ ސްޓޭޓް މިނިސްޓަރު ދުންޔާ ...

ރާއްޖެއަށް އެއް ބިލިއަން ޑޮލަރުގެ ލޯނެއް އިންޑިއާ އިން ދެނީ

ދިވެހިރާއްޖެ، ޗައިނާއަށް ދަރާފައިވާ ދަރަނި އަދާކުރުމަށް އިންޑިއާއިން ރާއްޖެއަށް އެއް ބިލިއަން ޑޮލަރުގެ ލޯނެއް ދިނުމަށް ނިންމައިފިއެވެ. މިކަން ...

ޝުކުރީ ކަރަންޓީނުވުމަށް ގެއަށް ވަޑައިގެންނެވީ ބަރޯ ގާޑިޔާއަކަށް ފޮށިތައް އަރުވައިގެން

މާލޭގައި ތިބެފައި ކަރަންޓީނު ވުމަށްދާ ރަށަށް ދިއުމުގެ ދަތުރު ހަމަޖައްސަން ޖެހޭނީ އަމިއްލައަށް ކަމަށް ހެލްތު ޕްރޮޓެކްޝަން އެޖެންސީ ...

އެމްޑީޕީގެ ޕްރައިމަރީގައި ވާދަކުރާ ކެންޑިޑޭޓުންގެ ތެރެއިން ތިންބައިކުޅަ އެއްބަޔަކީ އަންހެނުން

ކުރިއަށްއޮތް ލޯކަލް ކައުންސިލަށް ވާދަކުރުމަށް ކެންޑިޑޭޓުން ހޮވުމަށް އަންނަ ހުކުރު ދުވަހު ބާއްވާ އެމްޑީޕީގެ ޕްރައިމަރީގައި ވާދަކުރައްވާ ކެންޑިޑޭޓުންގެ ...

އަންނަ ހަފްތާގައި ސިޓީ ކައުންސިލްތަކަށް އިތުރު ބާރުތަކެއް ދިނުމަށް ހުށަހަޅާނަން – ރައީސް ސޯލިހު

ސިޓީ ކައުންސިލްތަކަށް ބާރުތައް ދީގެން ނޫން ގޮތަކަށް ރައްޔިތުންނަށް ދޭންޖެހޭ ޚިދުމަތް ނުދެވޭނެކަމަށާ  މިގޮތުން އަންނަ ހަފްތާގައި އޮންނަ ...

ސްޕެއިންގެ ޗެމްޕިއަން ރެއާލްމެޑްރިޑާއި އިޓަލީގެ ޗެމްޕިއަން ޔުއެންޓާސް ޗެމްޕިއަންސް ލީގުން ކަޓައިފި

ޗެމްޕިއަންސް ލީގުގެ  ގަދަ 16 ގެ ދެވަނަ ލެގްގައި  ރޭ ކުޅުނު މެޗުތަކުން ރިއާލް މެޑްރިޑާއި ޔުވެންޓަސް ބަލިވެ ...