ޔޮނެކްސް ސަންރައިސް ޕާކިސްތާން އިންޓަނޭޝަނަލް ސީރީސް ބެޑްމިންޓަން މުބާރާތުގައި މިއަދު ކުޅުނު އަންހެން ޑަބަލްސް ބައިން ރާއްޖޭގެ ފާތިމަތު ނަބާހާ އާއި އައިމިނަތު ނަބީހާ ރަން މެޑަލް ހާސިލްކޮށްފި އެވެ.
ޕާކިސްތާނުގައި މިއަދު ކުޅެވުނު ޔޮނެކްސް ސަންރައިސް ޕާކިސްތާން އިންޓަނޭޝަނަލް ސީރީސް ބެޑްމިންޓަން މުބާރާތުގެ އަންހެންބައިން ނަބާހާ އާއި ނަބީހާގެ ޕެއާ ޗެމްޕިއަންކަން ހޯދީ ފައިނަލުގައި ޕާކިސްތާނުގެ ބުޝްރާ ގައްޔޫމާއި މަހޫރު ޝަހުޒާދުގެ ޕެއާ އަތުން 21-17، 21-13 އިން މޮޅުވެގެންނެވެ.
ނަބީހާއި ނަބާހާ ޕެއާ އަންހެން ބައިގެ ޑަބަލްސް ޗެމްޕިއަންކަން ހޯދިއިރު މިމުބާރާތުގެ މިކްސް ޑަބަލްސް އިން ވެސް ނަބާހާއާއި ޒަޔާންގެ ޕެއާވަނީ ރަންމެޑަލް ހޯދާފައެވެ. މިކްސް ޑަބަލްސް ބައިން ނަބާހާ އާއި ޒަޔާން ރަން މެޑަލް ހޯދުމާ އެކު ވެގެން ގޮސްފައިވަނީ ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) އިން ރުހުން ދީފައިވާ މުބާރާތަކުން ރާއްޖެ އަށް ލިބުނު ފުރަތަމަ ރަން މެޑެއްޔަށެވެ. ޒަޔާނާއި ނަބާހާ ރާއްޖޭގެ ބެޑްމިންޓަނަށް މި ހޯދައިދިން ތާރީހީ ކާމިޔާބަށް ބޮޅެއް އިތުރުވީ އަންހެން ޑަބަލްސް އިން ނަބާހާ އާއި ނަބީހާގެ ޕެއާ ރަން މެޑަލް ހޯދުމުންނެވެ.
ނަބީހާ އާއި ނަބާހާގެ ޕެއާ މިއަދު ހޯދި ރަންމެޑަލާއެކު އަންހެން ޑަބަލްސްގައި ނަބީހާ އާއި ނަބާހާ މި ވަނީ ރާއްޖެ އަށް ބައިނަލްއަގުވާމީ މުބާރާތްތަކުން ނުވަ ވަނަ މެޑަލް ހޯދަދީފައެވެ.
ކޮމެންޓްސް (0)