ހުޅުދޫ ރަށްޔިތުން ހުޅުދޫ ފަޅު ނުކުރާކަމަށާ ހުޅުދޫ ފަޅުކޮށްފައިވަނީ ސިޔާސީ ފިކުރުތަކުންކަމަށް ލޯކަލް ކައުންސިލް އިންތިޚާބުގައި ހުޅުދޫދާއިރާއަށް އަމިއްލަގޮތުން ވާދަކުރައްވާ ކެނޑިޑޭޓް އައްބާސް ވާފިރު ވިދާޅުވެއްޖެވެ.
އައްބާސް މިގޮތައް ވިދާޅުވެފައިވަނީ އައްބާސްކުރައްވާފައިވާ ޓުވިޓެއްގައެވެ. އެ ޓުވިޓްގައި އިތުރަށް އައްބާސް ވިދާޅުވެފައިވަނީ ހުޅުދޫ ފަޅުވެފައިވަނީ ބަޔަކު މީހުން ގަސްތުގައި ހުޅުދޫ ފަޅުކުރުމުންކަމަށާ ދެން އެފުރުސަތު ނުދެއްވާނެކަމަށެވެ.
” ހުޅުދޫ ދެން ބައިބައި ނިވޭހެއް ، މިކޯ ދެން މާބޮނޑޮވަރުގެ ” އައްބާސް ގެ ޓުވިޓުގައި ވިދާޅުވެފައިވެއެވެ.
އައްބާސް ވޭތުވެދިޔަ ދުވަސްތަކުގައި ފެނިގެން ގޮސްފައިވަނީ ޕީޕީއެމްގެ ހަރަކާތްތަކުންނެވެ. ޚާއްސަކޮށް ކުރީގެ ހުޅުދޫ ދާއިރާގެ ރަށްޔިތުންގެ މަޖިލިހުގެ މެމްބަރު ޝާހިދު ( ޝާޑު) އާއި އެއްކޮށް ޕީޕީއެމްގެ ވަރަށް އިސްސަފުގައި އައްބާސް މަސައްކަތްކުރަމުންދިޔަތަން ފެނިގެން ގޮސްފައިވެއެވެ.
އައްބާސް އަމިއްލަގޮތުން ކައުންސިލް އިންތިޚާބުގައި ހުޅުދޫ ދާއިރާއަށް ކުރިމަތި ލައްވާއިރު ޕީޕީއެމްގެ ޓިކެޓްގައި މޫސާ ބުޝްރީ ހުޅުދޫ ދާއިރާއަށް ވާދަކުރައްވައެވެ. އަދި އެމްޑީޕީގެ ޓިކެޓްގައި ހުޅުދޫ ދާއިރާއަށް ފައިޒް ވާދަކުރައްވާއިރު އަމިއްލަ ގޮތުން ސީނުވެސް ވަނީ ހުޅުދޫ ދާއިރާއަށް ކުރިމަތި ލައްވާފައެވެ.
ކޮމެންޓްސް (0)