ގައުމު ސްޓްރީޓް ކަޕް – ވިއްސާރަވުމުގެ ސަބަބުން މިރޭގެ މެޗްތައް ކެންސަލްކޮށްފި

މިރޭ ކުޅުމަށް ތާވަލް ކުރެވިފައިވާ ގައުމު ސްޓްރީޓް ކަޕް ފުޓްބޯޅަ މުބާރާތުގެ ސެމީފައިނަލްގެ މެޗްތައް މިރޭ ނުބާއްވާގޮތައް  ހަމަޖައްސައިފިއެވެ.

މީދޫގައި ކުރިއަށް ގެންދާ މިމުބާރާތުގެ ސެމީފައިނަލްގެ މެޗްތައް ކެންސަލްކޮށްފައި މިވަނީ ވިއްސާރަ ވުމުގެ ސަބަބުންނެވެ.

ސެމީފައިނަލްގެ މެޗްތައް ކެންސަލްކުރިކަން ގައުމުން  ހާމަކޮށްފައިވަނީ ގައުމުގެ ފޭސްބުކް ޕޭޖްގައެވެ. އަދި މީގެ އިތުރަށް ސެމީފައިނަލްގައި ކުޅޭ ޓީމްތަކަށްވެސް މިކަން އަންގާފައިވާކަމަށް  މައުލޫމާތު ލިބިފައިވެއެވެ.

މޫސުމާއި ބެހޭ ގައުމީ އިދާރާ އިންވެސް މިއަދު މެންދުރު ފަހު 14:30 އިން މިރޭ 20:30 އަށް އައްޑޫހިމެނޭ ސަރަހައްދަށް މޫސުން ގޯސްވާނެކަމަށް ލަފާކޮށް ވައިޓް އެލާޓްވަނީ ނެރެފައެވެ.

އައްޑޫ ހިމެނޭ  މި ސަރަހައްދަށް ނެރެފައިވާ ވައިޓް އެލާޓް  ހާމަކޮށްފައިވާގޮތުން  އެޓާލް ނެރެފައިވާ ވަގުތުތަކުގައި  ބޯކޮށް ވާރޭ ވެހުމާއި އެކު ގުގުރާނެ ކަމަށާއި އަދި ވިލާގަނޑުގައި 40 މޭލަށް ވައިގަދަވާނެކަމަށް ލަފާކުރެވޭކަމަށްވެސް ހާމަކޮށްފައިވެއެވެ.

މިރޭގެ މެޗްތައް ވިއްސާރަވުމުގެ ސަބަބުން ކެންސަލްކުރިއިރު ގުޅިފައިވާ ރަށްތަކުން މިރޭގެ މެޗްތަކުގައި ކުޅޭ ބައެއްޓީމްތައްވަނީ މީދުއަށް އައިސްފައެވެ.

ޚަބަރާއި ގުޅޭ ފޮޓޯތައް: ލުބުނާ މަޖީދު މުޚްތާރު