ލ. ގަމު ރީޖަނަލް ހޮސްޕިޓަލު ޓާޝަރީ ހޮސްޕިޓަލަކަށް ބަދަލުކޮށް ލ. ކައްދޫ އެއާޕޯޓް އިންޓަނޭޝަނަލް އެއާޕޯޓަކަށް ބަދަލުކޮށް ތަރައްގީގެ މަޝްރޫއުތައް ހިންގުމުގައި ލ. އަތޮޅަށް ބޮޑު އިސްކަމެއް ދެއްވާނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ރައީސް ސޯލިހު މިހެން ވިދާޅުވީ “އެޖެންޑާ 19 ހައްދުންމަތީ ކޮންފަރެންސް”ގެ ނަމުގައި ލ. ގަމު ގައި ބޭއްވި ބައްދަލުވުމެއްގައި ވާހަކަފުޅު ދައްކަވަމުންނެވެ.
މިބައްދަލުވުމުގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ “އައްސޭރި ޓުއަރިޒަމް ޒޯން” އަލުން ތަރައްގީކުރުމުގެ މަސައްކަތް މިހާރު ފަށާފައިވާކަމަށާ މި ބަދަލުތަކާ އެކު ހައްދުންމަތި ވާނީ، ވަޒީފާތައް އުފެދިފައިވާ ވިޔަފާރިތައް ކުރިއަރާފައިވާ އަތޮޅަކަށްކަމަށެވެ. އަދި އޭގެ ސަބަބުން ލިބޭ ފައިސާ ގިނަވެ ލ.އަތޮޅަށް ލިބޭނެ ތަނަވަސްކަން އިތުރުވެގެންދާނެކަމަށް ވެސް ރައީސް ސޯލިހު ވިދާޅުވި އެވެ.
ރައީސް ސޯލިހު ވިދާޅުވީ ހައްދުންމައްޗަކީ އެންމެ ބޮޑަށް ތަރައްގީކުރަން ޖެހޭ އެއް ދާއިރާ ކަމަށެވެ. އެގޮތުން އެއީ ބިން ބޮޑު، ގުދުރަތީ ވަސީލަތްތައް ގިނަ، ބޭނުންތެރި މަސައްކަތްތަކެއް ކުރެވޭނެ ސަރަހައްދެއް ކަމަށް ވިދާޅުވިއެވެ.
އެހެންކަމުން ތަރައްގީ މަޝްރޫއުތައް ހިންގުމުގައި ލ،އަތޮޅަށް ބޮޑު އިސްކަމެއް ދީފައިވާ ކަމަށް ރައީސް ވިދާޅުވި އެވެ.
ކޮމެންޓްސް (0)