އެމްއީސީ ނެޓްބޯޅަ މުބާރާތުގައި މިރޭ ފޯރިގަދަ މެޗެއް ކުޅެވޭނެއެވެ. މިމެޗްގައި ބައްދަލުކުރާނީ ގްރޫޕް އޭ އިން ސެމީފައިނަލަށް ހޮވިފައިވާ ޓީމް ހުދުހުދާއި ހުޅުދޫ ޔޫތެވެ.
މިމެޗަށް މިދެޓީމް ނުކުންނައިރު ހުޅުދޫ ޔޫތުވަނީ އެޓީމް ކުޅުނު ތިން މެޗުން މޮޅުވެ 9 ޕޮއިންޓް ހޯދާފައެވެ. އަދި ޓީމް ހުދުހުދުވެސް ވަނީ އެޓީމް ކުޅުނު 3 މެޗުން މޮޅުވެ 9 ޕޮއިންޓް ހޯދާފައެވެ.
މިދެޓީމް ބައްދަލުކުރާ މިމެޗް ފޯރިގަދަ ވާދަވެރިމެޗަކަށް ވެގެން ދަނީ މިމެޗުން މޮޅުވާޓީމެއް ގްރޫޕް އޭ ގެ އެއްވަނަ ޓީމަކަށް ހޮވޭނެތީއެވެ. މިމެޗް އެއްވަރުވެގެން ނިމިއްޖެނަމަ ގްރޫޕް ގެ އެއްވަނަ ލިބޭނީ ހުޅުދޫ ޔޫތަށެވެ. އެއީ ޓީމް ހުދުހުދަށްވުރެ އެޓީމުން ކާމިޔާބުކޮށްފައިވާ ޕޮޓްގެ އަދަދު މާބޮޑަށްވެސް އިތުރުވާތީއެވެ.
މިރޭގެ މިމެޗް ވާދަވެރި ފޯރިގަދަ މެޗެއްގެ ގޮތުގައި ބެލެވޭ އަނެއްސަބަބަކީ މިމުބާރާތުގައި ވާދަކުރާޓީމްތަކުގެ ތެރެއިން ޕޮލިސްޓީމަކީ އެހެންޓީމުތަކާއި އަޅާބަލާއިރު މާބޮޑަށްވެސް ތަފާތު މޮޅު ކުޅުންތެރީންތަކެއް ހިމެނޭ ޓީމަކަށްވެފައި ސެމީފައިނަލްގައި ޕޮލިސްޓީމާއި އެއްވެސް ޓީމަކުން ކުޅެން ބޭނުން ނުވާނެތީއެވެ.
މިމެޗުން މޮޅުވާ ޓީމެއް ސެމީފައިނަލްގައި ބައްދަލުކުރާނީ ގްރޫޕް ބީގެ ދެވަނަ ޓީމްގެ ގޮތުގައި ސެމީފައިނަލަށް ހޮވުނު މިފްކޯ ޓީމާއެވެ. މިމެޗުން ދެރަވާޓީމެއް ސެމީފައިނަލްގައި ބައްދަލުކުރާނީ ގްރޫޕް ބީ ގެ އެއްވަނަ ޓީމްގެ ގޮތުގައި ސެމީފައިނަލަށް ހޮވިފައިވާ ޕޮލިސްޓީމާއެވެ.
ފޯރިގަދަވާނެކަމަށް ބެލެވޭ މިމެޗްގެ ކުޅުން ފެށޭނީ މިރޭ 8:00 ގައެވެ.
ކޮމެންޓްސް (0)