މިހާތަނަށް ރައީސަކަށް ނުދަންނަވާ ވަރުގެ ހޫނު މަރުހަބާއެއް މިއަދު އައްޑުއަތޮޅުން ރައީސް ސޯލިހުއަށް ދަންނަވާނެ

އެޖެންޑާ 19ގައި ހިމެނޭ އައްޑޫ ތަސައްވަރު ލޯންޗުކޮށްދެއްވުމަށް ރައީސް ސޯލިހު މިއަދު ހަވީރު އައްޑޫއަށް ވަޑައިގަތުމަށް ހަމަޖެހިފައިވާތީ އައްޑޫން މިހާތަނަށް ރައީސަކަށް ނުދަންނަވާ ވަރުގެ ހޫނު މަރުހަބާއެއް ދެންނެވުމަށް  ތައްޔާރުވަމުން އަންނަ ކަމަށް އެމްޑީޕީ އައްޑޫ ދާއިރާއިން ހާމަކޮށްފިއެވެ.

ރައީސް ސޯލިހު އައްޑުއަތޮޅަށް ވަޑައިގައިތުމަށް ހަމަޖެހިފައިވަނީ މިއަދު ހަވީރު 4 ޖަހާއިރުއެވެ. މި ދަތުރުފުޅިގައި ރައީސް ސޯލިހު އާއި އެކު ރައީސް ނަޝީދު އާއި ސަރުކާރުގެ ބައެއް ވަޒީރުންނާއި އެމްޑީޕީގެ ބައެއް އިސްވެރިން އައްޑުއަތޮޅަށް ވަޑައިގަތުމަށްވަނީ ހަމަޖެހިފައެވެ.

މައުލޫމާތު ލިބިފައިވާގޮތުގައި ރައީސް ސޯލިހު އާއި ކުރީގެ ރައީސް މުހައްމަދު ނަޝީދަށް މަރުހަބާ ދެންނެވުމަށް ސަޕޯޓަރުން މެންދުރު 2:30 އިން ފެށިގެން ގަން އިންޓަނޭޝަނަލް އެއާޕޯޓަށް ޖަމާވާން ފެށުމަށްވަނީ ހަމަޖެހިފައެވެ.

ރިޔާސީ އިންތިހާބުގެ ކެމްޕެއިން ފެއްޓުމަށް ރައީސް ސޯލިހު އައްޑުއަތޮޅަށް ވަޑައިގެންނެވި ދަތުރުފުޅާއި ކެމްޕެއިން ނިންމަވާލެއްވުމަށް ރައީސް ސޯލިހު އައްޑޫއަށް ކުރެއްވި ދަތުރުފުޅުގައިވެސް އެމަނިކުފާނަށް އައްޑުއަތޮޅުން ވަނީ ވަރަށް ހޫނު މަރުހަބާއެއް ދަންނަވާފައެވެ. އަދި ކުރީގެ ރައިސް މުހައްމަދު ނަޝީދުގެ ޖަލު ހުކުމުން މިނިވަންވެވަޑައިގެން އައްޑޫއަށް ވަޑައިގަތުމުންވެސް ރައީސް ނަޝީދަށްވެސް އައްޑޫ ރައްޔިތުން ވަނީ ވަރަށް ހޫނު މަރުހަބާއެއް ދަންނަވާފައެވެ.

ރައީސް ސޯލިހު މިއަދު އައްޑުއަތޮޅަށް ވަޑައިގަތުމަށްފަހު އެމަނިކުފާންގެ ސަރުކާރުން އައްޑޫ ތަރައްޤީ ކުރުމުގެ މަޝްރޫއު އިއްލާންކޮށްދެއްވުމަށް ބާއްވާ ޚާއްސަ ޖަލްސާ މިރޭ މަރަދޫ ބަނދަރު ސަރަހައްދުގައި ބޭއްވުމަށްވަނީ ހަމަޖެހިފައެވެ.