ރާއްޖޭގެ އުތުރުގެ އަތޮޅުތަކުގެ ބައެއް ރަށްރަށް ރޭ ބިންހެލުމުގެ އަރައިފިއެވެ.
މޫސުމާއި ބެހޭ ޤައުމީ އިދާރާއިން ހާމަކޮށްފައިވާގޮތުން ރޭ އުތުރުގެ ބައެއް އަތޮޅުތަކުގެ ރަށްތަކުން ބިންހެލުމުގެ އަސަރުކޮށްގެން ރިޕޯޓްކޮށްފައިވާ ކަމަށެވެ.
މިރިޕޯޓު ލިބުމާއި ގުޅިގެން ބެލި ބެލުމުން ހދ ހަނިމާދޫގައި ހުންނަ މޫސުމާއި ބެހޭ އޮފީހުގައި ބެހެއްޓިފައިވާ ބިންހެލުން މޮނީޓަރ ކުރާ މީޓަރަށް ރޭގެ 1:47 ހާއިރު ބިންގަނޑަށް އެރި ލޮޅުމެއް ރެކޯޑު ކުރެވިފައިވާކަމަށް މޫސުމާއި ބެހޭ ޤައުމީ އިދާރާއިން ހާމަކޮށްފައި ވެއެވެ.
އެއިދާރާއިން ހާމަކޮށްކޮށްފައިވާގޮތުން މި ބިންހެލުމުގެ ސަބަބުން ރާއްޖެއަށް ނުރައްކަލެއް ކުރިމަތިވެދާނެ ކަމަށް ލަފާ ނުކުރެވޭ ކަމަށެވެ.
ހއ އަތޮޅާއި ހދ އަތޮޅުގެ ބައެއް ރަށްރަށުގެ މީހުން ބުނެފައިވާ ގޮތުގައި ބިންހެލުމުގެ ސަބަބުން އެރި ލޮޅުން ގިނަ ބަޔަކަށް ފާހަގަވެސް ކުރެވުންނެވެ.
މީގެ ކުރިންވެސް ހައްދުންމަތީގެ ބައެއް ރަށްރަށަށްވެސް މިފަދަ ބިންހެލުމެއްގެ އިހްސާސްވެގެން ރިޕޯޓްކޮށްފައި ވެއެވެ.
ރާއްޖޭގެ އުތުރުގެ އަތޮޅުތަކަށް ބިންހެލުމުގެ އަސަރުކޮށްފައިވާއިރު ރާއްޖެ އާއި ކައިރި އެއްވެސް ހިސާބަކަށް ރޭ އެވަގުތުގައި ބިންހެލުމެއް އައިކަމަކަށް، އެމެރިކާގެ ޖިއޮލޮޖިކަލް ސާރވޭގެ ބިންހެލުމާއި ގުޅޭ ރެކޯޑްތަކަކުން ނުދައްކާކަމަށް ރާއްޖޭގެ މޫސުމާބެހޭ ގައުމީ އިދާރާއިން ވަނީ ހާމަކޮށްފައެވެ.
ކޮމެންޓްސް (0)